Videofilm "Keersemes in de Slevrouwe"

 

Veur z'ne keersaovend heet de Veldeke-Krink Mestreech verleie jaor 'ne videofilm, "Keersemes in de Slevrouwe", laote make. Oonder rezjie vaan bestuurslid Bert Beenkens gief cineas Marcel Jaspars de kieker 'n blomlezing oet de riekdom vaan de ajdste bisjopskèrk in eus land: de wesbouw, de kruusgaank en de sjatkamer, de crypte en de absis mèt häör bereumde kappitele, d'n ölger en z'n besjèlderde paniele, de roet mèt de keersbeelde, en de Sterre der Zee in de Merodekapel. Loupentere door de kèrk vertèlt 'nen ampa zie kleikeend get euver de historie vaan 't gebouw. De pestoer - allewijl 'ne Mestreechteneer - leus 't biebels keersverhaol in z'n mojertaol veur en Hans Heykers improviseert op d'n ölger, oonderwijl de köster mèt zie spinsleech de groete luuchter geit aonsteke. 't Basilicakoer begeleid door e striekersensemble o.l.v. Hans Leenders liet ziech fiestelek hure mèt hiemelse keersmeziek. Bij Slevrouw stik me 'ne bougie op. Dao weurt ouch 't sjoen-invoudeg gediech "Keersemes in de Merodekapel" vaan Bert Beenkens geleze:

 

Slevrouw,

Es iech zoe noe en daan bij Uuch

e keerske bran op hoop vaan zege,

daan straolt vaanaof Eur leef geziech

'ne stèlle lach vaan Uuch miech tege.

 

"Keersemes in de Slevrouwe" (20 minute) is vol aofwisseling en tegestèllinge: vaan meziek en veurdrach, stèlte en fiestelekheid, duuster en Leech. 't Is 'ne film dee d'ch pak, en versjeie opziechte.

 

Joop Kurris.

Oet: Veldeke jrg. 77, 2002, p. 12.

 

De videoband "Keersemès in de Slevrouwe" is in de Onze Lieve Vrouwekerk te koop voor € 15.