-
- Gebedsje aon de Sterre der Zee
-
- Slevruike,
- Geer moot ins nao miech luustere,
- Iech höb allewijl toch zoeväöl leid.
- Geer höb toch ouch zoeväöl geleije,
- Geer begrep toch wie 't miech geit?
- Want altied es bij hijj kom beije,
- 'ne bougie bran, daan hellep Geer miech;
- Iech veul miech daan zoe werrem vaan binne
- Door dee glimlach op Eur sjoen geziech.
-
- Slevruike,
- Geer höbt Eur eige Keend gehollepe
- Es Heer 't op eerd ins lestig had.
- Geer höbt noets de mood verlore;
- 'ch vraog miech aof, wie doog Geer dat?
- Iech zouw ouch geer al die miech leef zien
- Hellepe in verdreet en pijn,
- Meh dat vèlt miech soms zoe meujlek,
- Zoonder Eur höllep bin iech mer zoe klein.
-
- Slevruike,
- Iech veul miech soms zoe angstig,
- 't leve is allewijl zoe rauw.
- Leert Geer eus kinder te bewaore
- Oonderlinge leefde en trouw.
- Hellep ze hun kinder op te voede
- Tot lui die ierlek zien en good,
- En vèlt hun dat al ins lestig,
- Komp Geer hun daan tegemoot.
-
- Slevruike,
- Wèl Eur höllep ouch geve
- Aon invalide en aon kraanke luij;
- Sjik Geer hun e zonnesträölke
- Telkens weer, nao èder buij.
- Hellep Geer hun hun kruiske drage,
- Geen hun krach, gedöld en mood.
- Es Geer bij hun blijf, Maria,
- Dan kump alles toch wel good.
-
- Slevruike,
- Geef aon de lui die hellepe wèlle
- Leefde, begrip en väöl verstand.
- Altied klaor stoon dat is neet gemekelek.
- Numt Geer hun daan bij de hand.
- Want Geer wèt wat 't is te hellepe,
- Geer stònd ònder 't Kruus bij Eure Zoon.
- Leert Geer gezon lui um mèt de kraanke
- Hand in hand tezame te goon.
-
- Slevruike,
- 'i Is good bijj Uuch te zitte,
- Zoe gans kort bijj Uuch, in Eur kapel.
- Es 't ins neet geit, daan hoof iech niks te zègke,
- Geer kint miech, Geer begrep 't wel.
- Laot us ònder Eure mantel,
- Dao is gein kilte, dao is 't werrem.
- Veer wèlle altied bijj Uuch hure
- Zo wie 't kinneke op Euren errem.
-
- Slevruike,
- Laot Eur staar us paad verleechte,
- Num vaan us weg angst en verdreet,
- Laot us blijj zien, laot us zinge
- Umtot Geer altied bijj us zeet.
- Nein, Geer moot us noets verlaote,
- Zoonder Uuch is 't hijj leeg.
- E keend kin toch zien Ma neet misse
- En geer zeet toch 't moojerke van Mestreech !
-
-
- Mestreech, 14 juli 1991
-
- Gertie Ottenheijm-Janss
-
-